Lesendabréf frá árinu 1996 fer nú sem eldur í sinu milli norskra netverja. Í því segir Leif Osvold nokkur að öruggt sé að Netið muni líða undir lok innan skamms. Sagði hann litlar sem engar líkur á því að menn myndu græða nokkuð á viðskiptum um Netið.

Bréfið var birt í norska dagblaðinu Dagens Næringsliv undir fyrirsögninni Internett en flopp! eða Netið er klúður! Segir Osvold það ómögulegt að Netið muni hafa áhrif á daglegt líf fólks. Þrjár ástæður nefnir Osvold fyrir því að Netið muni ekki lifa af. Í fyrsta lagi að enginn græði á viðskiptum þar, í öðru að einkanotkun verði lítil sem engin og í þriðja lagi að magn upplýsinga verði slíkt að menn muni forðast að leita þeirra. Segir frá þessu á norska fréttavefnum Dagens Nærligsliv.

Tveimur árum síðar, 1998, endurtók hann svo leikinn og sagði notkun á Netinu minnkandi enda fólk orðið þreytt á því að leita þar án árangurs. Árið 1999 sendi hann enn eitt lesendabréfið og sagði meðal annars að „spádómarnir um að Netið verði notað með jafnalmennum hætti og aðrir miðlar hefðu tapað trúverðugleika sínum,“ og að það „yrði aldrei eins og fjölmiðill“.

Leitaði Dagens Nærlingsliv eftir viðbrögðum Osvold við því nú að bréf hans gengju milli manna á Netinu til skemmtunar. Sagði hann einungis vilja láta hafa það eftir sér að hann hefði farið með rangt mál.

www.mbl.is